Asnuchamanta
Huk asnus huk mayu patapi llamk’akuq kasqa. Llapan uywakunata mayu chimpachinanpaqsi pay kikin huk wamputa ruwasqa. Huk p’unchaysi huk riqsisqa yachaysapa k’ankaqa chay wampuman siqasqa. Hinaspas, mayu chimpasanankukamaqa rimayta qallarisqaku...
−Yaw asnucha, ¿mayqin kaqtaq llapan suyukunamanta aswan hatun?
−Ama chaykunata tapuwaychu, wawqíy k’anka. Suyukunamantaqa manam imatapas yachanichu.
−An... Ichaqa qillqaytaqa yachachkankichá.
−Manam, wiraqucha k’anka. Qillqaytapas ñawinchaytapas manam yachanichu.
−Hinaqa, ¿maypitaq jirafa tiyan?
−Chaykunamantapas manapunim yachanichu− nispas asnuqa llakisqa kutichisqa...
K’ankaqa asnumanta asikuspas kayhinata rimasqa: “¡Qamqa kuskan kawsayniykitam usuchisqanki! Kunankamaqa imallatapas yachanaykiñam karqan”, nispa. Chayhinata rimachkallaptinkus, qunqayllas para wayra kallpawan chayamusqa. Wampuqa mayumansi chinkaykuyta qallarisqa. Hinaptinsi, asnuñataq k’ankata tapuykun:
−Wiraqucha k’anka, ¿wayt’ayta yachanki?− nispa.
−¡Manam yachanichu!− nispas k’ankaqa mancharisqa qaparikusqa.
−Hinaqa, llapan kawsayniykitam usuchisqanki, kay wamputam mayu millp’uykunqa− chhaynatas mayu pataman wayt’asanankama asnuqa rimasqa.

AUTOR: Daniel Vargas Pareja

Conteste todas las Preguntas Correctamente y dé un click en Enviar y Grabar

Preg: 1.- Kay willakuymanhina, ¿pitaq mayu patapiri llamk’akuq kasqa?
Huk asnu.
Huk k’anka.
Huk jirafa.
N.A.
Preg: 2.- Kay willakuymanhina, ¿imapaqtaq asnuri wamputa ruwasqa?
Mayu ukhupi challwanapaq.
Karu suyukunaman rinankupaq.
Uywakunata mayu chimpachinanpaq.
N.A.
Preg: 3.- K’ankapa kaykuna ruwasqanmanta, ¿mayqintataq ñawpaqtari ruwasqa?
K’ankaqa manchasqa qaparikusqa.
K’ankaqa asnumanta asikusqa.
K’ankaqa wampuman siqasqa.
N.A.
Preg: 4.- ¿Imaraykutaq wampuri mayuman chinkaykuyta qallarisqa?
Para wayra kallpawan chayamusqanrayku.
Asnu mana allinta ruwasqanrayku.
Asnu nisuta llasasqanrayku.
N.A.
Preg: 5.- K’ankaqa asnuta nisqa: “Qamqa kuskan kawsayniykitam usuchisqanki”, nispa. ¿Ima niytataq chay rimayri munan?
Asnuqa wampunta chinkachisqa, niyta.
Asnuqa mana imatapas yachasqaraqchu, niyta.
Asnuqa chawpi mayupis wañurqunqa, niyta.
N.A.